Hiss ləqəbi ilə tanınan müğənni Röya Məmmədova Musavat.com-un suallarını cavablandırıb.
Müğənni ilk olaraq özünəməxsus imicindən söz açıb:
"Başqalarından fərqli olaraq, cəlbedici, seksual görünməyə çalışmıram. Sadəcə rahatlıq tərəfdarıyam".
- Nə vaxtsa imicinizi dəyişməyi düşünürsünüzmü?
- Hələ ki, belə rahatam. 30-40 yaşımdan sonra dəyişib-dəyişməyəcəyimi də indidən deyə bilmərəm. Amma ola bilər hansısa klipdə bu dəyişikliyi edim.
- Birdən-birə digər müğənnilərdən irəli çıxaraq, parladınız, populyarlaşdınız. Bu uğurun sirri nədədir?
- Bəli, parlamağım rahat oldu. Bunu şans da adlandırmaq olar. Əlbəttə ki, özüməməxsus xarakterim, istedadım, görünüşüm, enerjim uğur qazanmağıma təsir etdi. Amma ən əsası, şanslı müğənni, insanam.
- Peşəkar musiqi təhsili almaq fikriniz varmı?
- Xeyr. Düşünürəm ki, musiqi təhsilinə ehtiyacım yoxdur. Çünki işlədiyim tərz, iş mənə imkan verir ki, istedadımı ortaya qoya bilim.
- Bəs yeni musiqi işləyəndə kimdənsə məsləhət alırsınızmı?
- Xeyr, bütün qərarlarımı özüm verirəm. Yeni mahnım da ərsəyə gələndə ilk yanımda kimlər varsa, onlara dinlədirəm.
- Şəxsi həyatınızda baş verənlər mahnılarınıza sirayət edirmi?
- Məncə, yox. Bəzi müğənnilər deyir ki, guya sevəndə daha gözəl ifa edirlər, bu, boş-boş danışıqlardır. Şəxsən məndə belə düşüncə olmayıb. Daxilən çox hissiyyatlıyam, ona görə də heç nə yaşamasam belə, o hissləri mahnılarımda, səsimdə verə bilirəm.
- Musiqidən başqa hansı sahədə istedadınız var?
- Mənim digər istedadlarım da incəsənətlə bağlıdır. Məsələn, çox gözəl rəsm çəkirəm. Həmçinin dizaynerlik sahəsində çox gözəl istedadım, bacarığım var. Düşünürəm ki, bəlkə də müğənni olmasaydım, çox yaxşı modelyer olardım.