“Regional problemlərin siyasi yolla həllinə inanırıq”
Azərbaycan və İran prezidentləri birgə mətbuat konfransı keçiriblər.
"Azərbaycan həmişə İrana tətbiq edilən sanksiyaların əleyhinə olub və beynəlxalq arenalarda öz fikrini bildirib”. İran mediasına istinadən verdiyi məlumata görə, bu sözləri Azərbaycan prezidenti İlham Əliyev Tehranda iranlı həmkarı Həsən Ruhani ilə keçirdiyi birgə mətbuat konfransında deyib.
Azərbaycan prezidenti İrana tətbiq edilən sanksiyaların götürülməsindən çox şad olduğunu deyib, İran xalqını və prezidentini təbrik edib.
İran prezidenti Həsən Ruhani isə açıqlamasında bildirib ki, regional problemlərin hərbi yolla deyil, siyasi yollarla həll olunacağına inanır.
O bildirib ki, azərbaycanlı həmkarı ilə son 2,5 ildə ərzində 5-ci dəfə görüşür: “Hər görüşdə iki dost, qardaş və qonşu ölkə arasında ikitərəfli əməkdaşlıq sahəsində əldə olunan irəliləyişlər müzakirə olunur”.
H. Ruhani qeyd edib ki, Azərbaycan prezidenti ilə görüş zamanı vacib siyasi məsələlər, habelə iqtisadi və mədəni sahədə ikitərəfli əməkdaşlıq məsələləri müzakirə edilib: “Cənubla şimalı birləşdirən Astara-Astara tranzit dəhlizi ilə bağlı ilin sonunadək vacib irəliləyişin şahidi olacağıq”.
İran prezidenti görüşdə həmçinin energetika, neft-qaz, Xəzərin ehtiyatlarının bölünməsi və birgə istifadəsi barədə konstruktiv danışıqların aparıldığını bildirib. Görüşdə islam dini ilə bağlı məsələlər və Suriya problemi də müzakirə edilib.
Xəbər lenti
