- Təbii, burada bütün məqamlar var. Ancaq Azərbaycan Xalq Cəbhəsi Partiyası yenə deyirəm ki, zamanında milli-azadlıq hərəkatının rəhbəri Əbülfəz Elçibəyin liderliyində bizim yaratdığımız bir təşkilatdır. AXCP bizim təşkilatımızdır. Bu gün həmin təşkilatın davamçıları bizi qurultaylarına dəvət etsələr də, etməsələr də biz o təşkilatı öz təşkilatımız hesab  edirik.

- Hər zamanın öz şərtləri və imkanları, hər siyasətçinin öz üslubu olur. Biz sizin dediyiniz missiyanı indiki mərhələdə birbaşa deyil, nümunə göstərməklə, cəmiyyətə zəruri ideyalar təqdim etməklə həyata keçirməyi daha səmərəli sayırıq. Eyni zamanda siyasi partiyaların hamısına düşünüb daşınmaq, keçdikləri yolu diqqətlə gözdən keçirib, nələri düz, nələri yanlış etdiklərini analiz etmək üçün müddət tanımaq lazımdır. Yəni imkan verilməlidir ki, hər bir partiya öz yolunu dəqiqləşdirsin. Əminəm ki, məqamı yetişəndə Azərbaycanda həqiqətən demokratik dəyişikliklər istəyən bütün qüvvələr - siyasi partiyalar da, media strukturları da, jurnalistlər də, vətəndaş cəmiyyəti təmsilçiləri də bir arada olacaqlar. Və bu birliyin də biz vahid təşkilat kimi deyil, demokratik düşərgə tərəfindən qəbul edilən vahid hədəf uğrunda funksional əməkdaşlıq modeli kimi məqsədəyğun olacağını düşünürük. 

- Azərbaycanın da, dünyanın da gündəmində olan bütün köklü məsələləri müzakirə eləməyə çalışırıq. Milli Strateji Düşüncə Mərkəzi fəaliyyətə başlayanda ilk açıq tədbirlərimiz Azərbaycana, bütünlükdə Qafqaza Rusiya təhlükəsi ilə bağlı olmuşdu. O zaman Rusiya təhlükəsi ölkə üçün bəlkə də indiki qədər açıq-aydın görünmürdü. Eyni zamanda hələ dünya Rusiyanın çevrəsindəki ölkələr üçün necə böyük bir təhlükə olduğunu açıq-aydın etiraf etmirdi. Biz bu haqda geniş müzakirələr təşkil etdik, açıq toplantı keçirdik, sənəd hazırladıq, həmin sənədi müzakirələrdən sonra qəbul etdik. Sonrakı tədbirimiz Qarabağ probleminə həsr olunmuşdu. Biz Qarabağ problemi yaranan gündən problemin bugünkü durumuna qədər məsələni ətraflı müzakirə etməyə çalışdıq. Göründüyü kimi, Milli Strateji Düşüncə Mərkəzi əsasən ölkənin köklü məsələlərini müzakirə etməyə çalışır. Eyni zamanda Azərbaycanda daxili vəziyyət o qədər bərbaddır ki, biz ölkənin iç problemlərini də müzakirə etmək məcburiyyətindəyik. Söhbət həm seçki məsələlərindən, həm siyasi məhbuslarla bağlı durumdan, həm vətəndaş cəmiyyətinin problemlərindən, həm media azadlığından gedir. Milli Strateji Düşüncə Mərkəzi olaraq biz bu məsələləri müzakirə etmək məcburiyyətindəyik.

 Çünki bu problemlərin hamısı Azərbaycanın təhlükəsizliyi üçün gerçək bir təhdidə çevrilib. Seçkilərin antidemokratik şəraitdə keçirilməsi, ölkədə bu qədər siyasi məhbusun olması, vətəndaş azadlıqlarının bu dərəcədə məhdudlaşdırılması Azərbaycanın təhlükəsizliyi üçün çox ciddi problemlər yaradıb. Bu problemlər gündən-günə böyüyür. Beynəlxalq təşkilatların da son dönəmlər ortaya qoyduğu mövqelər məhz bundan xəbər verir. Bütün bu məsələlər Milli Strateji Düşüncə Mərkəzinin gündəmindədir. İş üsulumuz da yaranandan bəri müəyyən olunduğu kimidir - həftədə bir dəfə toplaşırıq və qapalı müzakirələr keçiririk. 

“Qapalı müzakirə” deyəndə jurnalistlərdə həmin yığıncaqlara xüsusi maraq oyanır. Yəni biz mediasız, açıq, səmimi, ciddi müzakirələrə üstünlük veririk. Ancaq gündəmin konkret məsələsi ilə bağlı hansısa sənəd, yaxud tövsiyə xarakterli paket hazırlanması ehtiyacı yaranırsa, artıq həmin məsələ ilə bağlı baxışımızı cəmiyyətə açıq təqdim etmək mərhələsi gəlirsə, dəyirmi masa, konfrans formatında toplanıb düşüncələrimizi cəmiyyətə təqdim etməyə çalışırıq. Təxminən bu ritmdə çalışmalarımız davam edir. Proqnoza gəldikdə isə, məncə, təkcə MSDM üçün deyil, düşünən, dünyanın gedişini diqqətlə izləyən hər kəsə aydın olmalıdır ki, dünya böyük dəyişim dövrünü yaşayır. Yeni dünya düzəni formalaşır. Bu dövr bir çox ölkələrdə avtoritar rejimlərin çökməsi, köklü demokratik dəyişikliklərin gerçəkləşməsi və bütövlükdə azad dünyanın əhəmiyyətli dərəcədə genişlənməsi ilə yekunlaşacaq. Bu proqnoz Cənubi Qafqaza da aiddir.

- Çətin sualdır. Çünki hər bir Azərbaycan vətəndaşı işğal altında olan torpaqlarımızın azad edilməsinin nə qədər ləngidiyinin fərqindədir. Hamımız torpaqlarımızın tezliklə  işğaldan azad olunmasını istəyirik. Yenə də Azərbaycan hakimiyyətinin yanlış, konsepsiyasız, plansız, proqramsız siyasəti nəticəsində məsələ o qədər mürəkkəbləşib ki, onu asanlıqla həll etməyin mümkünlüyü haqqında düşünmək düzgün olmazdı. Qarabağ probleminin hərbi yolla həlli indiki mərhələdə real görünmür. Rusiyanın nəzarəti altında kiçik bir müharibə aparıb bir neçə məntəqəni işğaldan azad edib bunu qələbə kimi təqdim etmək, əvəzində ciddi güzəştlərə getmək Azərbaycan üçün fəlakət ssenarisidir. Haqqında söhbət gedən kiçik müharibə ssenarilərinin sonunda Rusiya Silahlı Qüvvələrinin sülhməramlı qüvvələr adı altında Azərbaycan torpaqlarının ayrılmaz parçası olan Dağlıq Qarabağa yerləşdirilməsi nəzərdə tutulur. 

Bu, Azərbaycanımızın minlərlə şəhid hesabına bərpa etdiyi müstəqilliyin, suverenliyin itirilməsinə bərabər olardı. Buna heç bir şəkildə yol vermək olmaz. Azərbaycan hakimiyyətinin Qarabağ məsələsini başqa bir şəkildə Azərbaycanın xeyrinə həll edəcəyi də görünmür. Ona görə də bu məsələlərə birmənalı cavab verməyi düzgün saymıram. Mən öz tərəfimdən belə hesab edirəm ki, Qarabağ məsələsinin danışıqlar yolu ilə həlli imkanları hələ tükənməyib. Sadəcə olaraq bunun üçün Azərbaycanın çox aydın gerçəkçi bir planı olmalıdır, bu plan üzrə hərəkət edilməlidir. Bu planın içərisində həm ölkədə siyasi-iqtisadi azadlıqların gerçəkləşdirilməsi olmalıdır, həm Azərbaycanın öz geosiyasi seçimini etməsi nəzərdə tutulmalıdır, həm də beynəlxalq münasibətlər sahəsində çox aktiv diplomatik addımların atılması yer almalıdır.