“125-lər” Siyasi Klubunun üzvü Yeganə Hacıyevanın “Yeni Müsavat”a müsahibəsi
- Namizədliyinizi hansı dairədən irəli sürmüsünüz? İlk mərhələ necə keçdi? Bəzi namizədlər bildirir ki, onlardan qanunvericilikdə nəzərdə tutulmayan sənədlər tələb olunub. Sizdən belə sənədlər tələb olunmadı?
- Namizədliyimi 26 saylı Sabunçu Birinci Seçki Dairəsindən irəli sürmüşəm. İlk mərhələnin çox da rahat keçdiyini söyləyə bilmərəm. Məsələn, sənədlərimizi qanunvericilikdə V çağırış Milli Məclis seçkiləri üçün namizədliyin irəli sürülməsinə rəsmi start verilən gündən Dairə Seçki Komissiyasına təqdim etməyə cəhd göstərsək də, buna ancaq bir necə gün sonra nail ola bildik. Sənədlərimin rəsmən sentyabrın 5 dən təqdim etməyimə baxmayaraq isə hələ də namizədliyimin dəstəklənməsi üçün imza vərəqlərimi ala bilməmişəm. Ümumiyyətlə isə qeyd edim ki, seçki qanunvericiliyində boşluqlar mövcuddur, həmçinin seçki qanunvericiliyi ilə Mərkəzi Seçki Komissiyasının təlimatları arasında bəzi uyğunsuzluqlar var və bunlar təzad yaradır, müəyyən məsələlərdə namizədlər üçün narahatçılıq yaradır. Mən də bu narahatçılıqdan kənarda deyiləm. Digər namizədlər imza toplamağa başlayıb, ancaq biz imza vərəqələrini götürə bilmədiyimiz üçün yubanırıq. Buna görə də mövcud zamandan seçkidə iştirakın texniki detallarını yekunlaşdırmaq üçün istifadə edirik. Bura seçki qərargahının texniki təchizatından tutmuş, daha öncədən hazırladığımız seçki strategiyamızın detallarının dairəyə uyğunlaşdırması işlərini həyata keçirmək aiddir.
- Yardımçılarınız kimlərdir?
- Seçki marafonuna tamamilə gənclərdən ibarət 230 nəfərlik konüllülərdən ibarət seçki komandası ilə qatılmışam və beynəlxalq standartlara cavab verən bir seçki kampaniyası aparmaq niyyətindəyəm. Bu həmçinin Azərbaycan siyasətində bir ilkdir. Komandamız məntəqələr və seçici təbəqələri üzrə fəaliyyət göstərən işçi qruplara, yerli və beynəlxalq PR qruplarına , müşahidəçilər və lojistik məsələləri həll edəcək qruplara bölünüb. İndi komandalar üzrə texniki işləri yekunlaşdırmışıq və seçkiyə tam hazırıq deyə bilərəm. Digər tərəfdən komanda dairədə təmasları qurur, dairə ərazisində olan məktəb, gənclər evi, biznes, xidmət obyektləri, bazarlar, məscid və s. mərkəzlərlə tanış olurlar. Həmçinin məntəqələr üzrə problemlər və narahatçılıqları öyrənir, bütün bunları əhatə edən xüsusi baza yaradırıq. Bu təmaslarda tanış olduğumuz yüzlərlə seçici var. Sevindirici haldır odur ki, tanış olduğumuz seçicilərimizdən, xüsusilə gənclərdən bizləri tanıyanlar olur.
Ümumiyyətlə isə tanış olduğumuz seçicilərdən müsbət impuls alırıq. Xüsusilə namizədin gənc, Avropa təhsilli və iş təcrübəsi, beynəlxalq təşkilatlarda təmsilçiliyi olan bir xanımın olması onlarda rəğbətlə qarşılanır. Etiraf etməliyəm ki, builki seçki marafonu mənə özümdə və cəmiyyətimizdə bir çox xüsusiyyətləri kəşf etməyə imkan verdi. Bu üzdən hədsiz şadam. Bir şeyi qəti deyə bilərəm, Azərbaycan seçicisi diqqətsizlikdən, seçkidən-seçkiyə aktivləşən, gözə görünən, öncə söz verən və seçkidən sonra itib və bir də növbəti seçkidə peyda olan millət vəkillərini görməkdən seçkiyə güvən limitini və marağını itirib. Həmçinin, Azərbaycan seçicisi ona və problemlərinə diqqət göstərən, fikirlərinin öyrənilməsinə ehtiyac duyan bir seçicidir. Cəmiyyətimizdə kök atmış və uzun illər mənsub olduğum keçmiş camiənin də iddia etdiyi kimi, seçkini iqnora qoyan bir seçici deyil. Sadəcə, özünə diqqətsizlikdən prosesə marağını itirmiş bir kontingentdir.
- Rəqiblərinizin durumu necədir? Kimlərlə mübarizə aparacaqsız? Dairəni MM-də hazırda təmsil edən Fazil Mustafa haqqında seçiciləri nə deyir?
- Mən ümumiyyətlə, həyatımda gördüyüm bütün işləri, verdiyim bütün qərarları imkanlara və ya fərdlərə görə deyil, dəyərlərə görə formalaşdırıram. Seçki kampaniyamın aparılmasında ən az diqqət yetirdiyim mövzu rəqib və onların fəaliyyətidir. Bu seçki kampaniyasını da fəaliyyətimizi seçiciyə, onun problemlərinə, onun istək və arzusuna yönəlik və ən əsası isə fərdlərin deyil, dəyərlərin üzərində qurmuşuq. O üzdən rəqibin kimliyinin bizim üçün əhəmiyyəti azdır.
- YAP-ın siyahısı açıqlanmadığına görə seçkidə iştirak etmək istəyənlərin bəziləri hələ də gözləmə mövqeyindədir. Onların bu addımını necə dəyərləndirirsiz? Sizcə, YAP niyə namizədlərini irəli sürümür?
- Seçkiyə hazırlıq uzun müddətli fəaliyyət tələb edən bir prosesdir. YAP-ın namizədlərinin irəli sürülməsindən sonra seçki gününə çox az bir müddət qalacaq. Bu kiçik zaman müddətində uğurlu seçki kampaniyası qurmaq imkanına şübhə edirəm və indi gözləmə mövqeyində olub hansısa təsadüfi şanslara ümid edənləri qeyri-ciddi siyasətçi kimi qəbul edirəm. YAP-ın namizədlərinin irəli sürülməsinin gecikməsinə gəlsə, bu partiya minlərlə üzvləri olan bir partiyadır. Məntiqi olaraq seçkidə özünü sınamaq istəyən çoxlu sayda üzvləri var. Siyahı çoxsaylı namizədlər sırasından seçim etmək çətinliyi üzündən gecikmiş ola bilər.
- Seçkini boykot taktikasına necə baxırsız? Belə qeyri-müəyyən durumda mübarizə bəribaşdan uğursuzluq vəd edirsə, seçkiyə niyə gedilməlidir?
- Seçkinin boykot edilməsinə birmənalı olaraq, mənfi baxıram. Seçki dövlətin və cəmiyyətin həyatında ən mühüm siyasi proseslərdən biridir. Siyasətlə məşğul olan insanların, qrupların və təşkilatların siyasətdə ən mühüm hadisələrdən olan seçkidə iştirak etməməsinin məntiqi izahını görmürəm. Qeyri-müəyyən durumda mübarizə aparmaq məsələsinə gəlsək, siyasət mövcud imkanları dəyərləndirərək gələcəyə baxmaq, mövcud şəraitlərdən yeni imkanlar yaratmaq sənətidir. O üzdən özünü siyasətlə ciddi məşğul olduğunu söyləyən qurum, təşkilat və ya fərdin seçkidə iştirak etməmək seçimini doğru hesab etmirəm.
- Avropa Parlamentinin Azərbaycanla bağlı son mövqeyi, ardınca ATƏT-in seçkini müşahidə missiyasından geri çəkilməsi prosesə necə təsir edəcək? Bu, seçkini saxtalaşdırmağa adət etmiş Azərbaycan hakimiyyətinə daha geniş imkanlar vermirmi? Qərbin bu taktikası Azərbaycanda Rusiya meyllərini daha da artırmayacaqmı?
- Keçən həftə Avropa Parlamenti Azərbaycan məmurlarına qarşı sanksiyalar tətbiq etmək və siyasi məhbusları qeyd-şərtsiz azad etmək, habelə onlara qarşı bütün ittihamları ləğv etmək çağırışı yer alan qətnamə qəbul edilib. Düzünü söyləyim, qətnamə mənim üçün gözlənilməz deyildi. Hələ bir az irəli gedərək deyə bilərəm ki, vəziyyət belə davam edəcəyi halda gələn payız Azərbaycan məmurlarına qarşı sanksiyaların tətbiqi qaçılmazdır.
Qətnamənin ardınca Azərbaycan XİN Avropa İttifaqının nümayəndəsini çağırdı və Bakıya qarşı sanksiyaları qəbul etməməyi tələb etdi. Bu vəziyyətin ciddiliyindən xəbər verir. Ümumiyyətlə isə mən hesab edirəm ki, Avropa Parlamentində səslənən tənqidlərə, qəbul edilmiş qətnamələrə cavabları Azərbaycan mediasında deyil, bu qurumların özündə və ən əsası, zamanında vermək lazımdır. Çox təəssüf, Azərbaycanı təmsil edən nümayəndə heyətinin bu istiqamətdə nəinki fəaliyyət göstərmək təşəbbüsü, heç imkanı da yoxdur.
Xarici dil və müasir strateji kommunikasiya imkanları, hətta onları əldə etmək istəyi və qabiliyyəti olmayan nümayəndələrlə Avropada uğurlu siyasət aparmağın mümkünlüyündən danışmaq yersizdir. İngiliscə danışmaq hələ avropalının anladığı dildə danışmaq mənasını vermir. İndiki nümayəndə heyətinin fəaliyyəti Azərbaycanı, onun milli maraqlarını, beynəlxalq təşkilatlarda müdafiəsiz buraxıb.
Builki seçkilər bu istiqamətdə mövcud vəziyyəti yaxşıya doğru dəyişmək üçün əla imkan ola bilər. Problemlər varsa, onları inkar etmək yox, danışıqlar yolu ilə çözüm tapmaq, onları həyata keçirmək lazımdır. ATƏT-in müşahidə missiyasının Azərbaycana gəlməsindən imtina etməsindən ilk narahat olası tərəf rəsmi Bakıdır.
Bu parlament seçkilərinin beynəlxalq legitimliyini şübhə altına ala bilər. Bu halda növbəti ildə Azərbaycan maraqlarını beynəlxalq təşkilatlarda tamamilə müdafiəsiz qalacaq. Bu, sanksiyaların həyata keçirilməsi üçün münbit şərait yaradacaq. Qərbin bu yanaşmasının Azərbaycan hökumətində Rusiya meylliyin artırması ilə nəticələnəcəyinə isə şübhə edirəm. Azərbaycan regional və qlobal layihələrlə Qərblə çox sıx bağlıdır, bu bağlar asanlıqla qırıla bilməz.
скачать dle 12.1