Təhsil prosesinin normal təşkilini təmin edən əsas sənədlərdən biri dərs cədvəlidir.
Buna görə də tədris ocaqlarında dərs cədvəlinin tərtibinə ciddi diqqət yetirilməlidir. Lakin bəzi ümumtəhsil məktəblərdə bu belə deyil. Yəni dərs cədvəlinin birinci saatını fiziki tərbiyə, musiqi, rəsm kimi nisbətən asan fənnlər təşkil edir. Növbəti saatlarda isə aparıcı fənnlər ardıcıl keçildiyindən şagirdlər zehni cəhətdən yorulur və dərsləri qavramaqda çətinlik çəkirlər. 34 ildir pedaqoji sahədə çalışan Nüşabə Məcidovanın sözlərinə görə, fiziki tərbiyə dərslərinin yazılı çalışmaların yerinə yetirildiyi fənnlərdən əvvəl keçilməsi məqsədəuyğun deyil. Çünki bu həm şagirdlərin fiziki cəhətdən yorulmasına, həm məktəbli geyimlərinin sıradan çıxmasına səbəb olur. Müəllim onu da bildirdi ki, həftə sonu tədris olunan fənlərin də cədvəli düzgün bölüşdürülməlidir.
Həftənin dördüncü gününə qədər çətin dərslər keçilməlidir. 5- 6-cı günlər isə asan və tez başa düşülən fənnlər salınmalıdır. Dərs cədvəlinin tərtibi zamanı məktəblinin sağlamlıq, psixoloji və fizioloji imkanları nəzərə alınmalıdır. Çünki bunlar təhsilin keyfiyyətinə mühüm təsir göstərir.