Çində addımlayan robot rekorda imza atdı - VİDEO
Çinin Çuntsin Universitetinin Avtomatlaşdırma məktəbinin tədqiqatçıları tərəfindən tərtib edilmiş “Xingzhe No.1” adlı addımlayan robot kvadropodlar üçün müəyyən edilmiş məsafədə Ginnesin yeni rekorduna imza atıb.
Dördayaqlı robotun nailiyyətləri barədə Ginnesin Rekordlar Kitabının saytında məlumat yerləşdirilib.
Məlumatda deyilir ki, “Xingzhe No.1” bir enerji doldurulmasında 54 saat 34 dəqiqəyə 134 kilometr 30 metr məsafəni qət etməyə nail olub. Bununla da Çin kvadropodu daha öncəki amerikalı “Ranger” adlı robota məxsus rekordu iki dəfədən artıq yaxşılaşdırıb. Belə ki, 2011-ci ildə bu robot bir enerji dolumunda 65 kilometr və 180 metr məsafəni gedə bilib.
Qeyd edək ki, müxtəlif alimlər komandası mütəmadi olaraq addımlayan robotlar sahəsində əldə olunan uğurları izləyirlər. Oktyabr ayının ortalarında Yaponiyanın Tiba şəhərinin Texnoloji Universitetindən olan araşdırma qrupu yumru karkasa malik QRoSS adlı kompakt robotu təqdim edib. Avqust ayında isə “Boston Dynamics” şirkəti “Atlas” adlı insanabənzər robotun ərazini qət etmək imkanlarını nümayiş etdirib.
Xəbər lenti
