Kerri: ABŞ və Rusiya Suriyada İŞİD-ə qarşı əməliyyat sistemi yaradacaq
ABŞ və Rusiya Suriyada atəşkəs razılığının qorunması və terrorçulara qarşı əməliyyat aparmaq üçün sistem yaratmaq barədə razılığa gəliblər. FaktXəbər-in verdiyi məlumata görə, bu barədə ABŞ Dövlət Katibi Con Kerri bəyan edib.
Kerri son zamanlar RF XİN rəhbəri Serqey Lavrov ilə bir neçə dəfə ünsiyyətdə olduğunu da xatırladıb. Onun sözlərinə görə, tərəflər aparılan missiyanın həqiqətən də İŞİD və "Cəbhət ən-Nusra"ya qarşı olduğuna zəmanət verən sistemin yaradılması barədə razılığa gəliblər.
Kerri həmçinin vurğulayıb ki, Vaşinqton və Moskva atəşkəs rejiminin pozulması xəbərinə çox ciddi yanaşır: «Biz bu barədə mətbuat üçün geniş məlumat verməyəcəyik. Biz bu pozuntuları aradan götürmək fikrindəyik».
Xatırladaq ki, fevralın 22-də Rusiya və ABŞ müzakirələrindən sonra atəşkəs barədə razılığa gəlinib. Atəşkəs rejimi İŞİD, "Cəbhət ən-Nusra" və onlara qoşulan qruplaşmalara tətbiq edilmir.
Xəbər lenti
